«Қызғалдақ» бөбекжай бақшасы
Ғажайып - сиқырлы қолшатыр
«Бәйтерек» ортаңғы тобы
Тәрбиешісі: Қосымғалиева С.А.
2023 жыл
Тақырыбы: «Ғажайып-сиқырлы қолшатыр»
Мақсаты: Балаларды түрлі музыкалық шығармашылық әрекеттерге
қатыстыра отырып, өнерге, ән айтуға, би билеуге бейімдеу. Мерекелік іс –
шараға ұжымдық ауызбіршілікпен қатыса отырып, бір – бірін тыңдай білуге,
сыйлауға баулу. Күздің кереметтерін, күзгі табиғат құбылысындағы
өзгерістерді ұғындыру арқылы табиғатқа сүйіспеншілікке, қамқорлыққа
баулу. Осы арқылы балалардың, көрермендердің эмоционалдық көңіл – күйін
көтеру.
Жүргізуші: Қайырлы күн, құрметті қонақтар! Берекелі де мерекелі Алтын
күз мерекесі құтты болсын! «Бәйтерек» ортаңғы тобының бүлдіршіндері
дайындаған «Ғажайып -сиқырлы қолшатыр» атты ертеңгілігімізге қош
келдіңіздер!
Ән салыңдар, күліңдер,
Жайнап гүлдей жүріңдер.
Күздің тойын тойлайық
Би билейік, ойнайық! дей отыра «Бәйтерек» ортаңғы тобының
бүлдіршіндерін қарсы алайық!
Музыкамен балалар сахнаға кіреді.
Жүргізуші: Балалар қараңдаршы , айнала неткен әдемі,неткен әсем.Біздер
қандай мерекені тойлағалы жатырмыз? Әрине күз мерекесін.Ендеше Алтын
күз мерекесін тойлауға біздің ортамызға кім керек? Күз ханшайымын қарсы
алайық.
Ортаға Күзханшайымы келеді. Қолында қолшатыры бар.
Күз ханшайымы:
Уа халайық, дархан далам армысың!
Табиғатым жаны жайсаң тал мүсін.
Ханшайымы күздің бүгін келіп тұр,
Алмақ болып бар халқымның алғысын.
Мен күзгі ханшайыммын. Сендерді көргеніме қуаныштымын. Мен сендерге
сонау алыстан арнайы келдім. Қанекей, маған өнерлеріңді паш етіңдер.
Жүргізуші: Қош келдің, Күз ханшайымы! Біз де сені көргенімізге
қуаныштымыз. Біздің бүлдіршіндердің барлығы өнерлі. Ендеше
бүлдіршіндеріміздің әнін қарсы алайық.
Ән: Алтын күз келді.
Жүргізуші: Күз ханшайымы, қолшатырың өте әдемі екен!
Күз ханшайымы: Йә, бұл жәй қолшатыр емес. Бұл сиқырлы қол шатыр.
Жүргізуші: Сиқырлы дейсің бе? Ендеше,тексеріп көреміз бе,
балалар?.Қолшатыр не істей алады екен?
Күз ханшайымы: Балалар, күзде жапырақтардың түстері қандай болады?
Менің қолшатырымнан, қазір, күзгі қызғылт сары жапырақтар шығады.
Музыка ойнайды. Күз ханшайымы қолшатырын айналдырып, -Қызыл сары
жапырақтар, қане,жерге төгілші! – деп, ашқанда жапырақтар төгіледі. –
Ендеше, осы күзгі жапырақтармен би билейік!
Жапырақтар биі
Күз ханшайымы: Ендігі кезекте сиқырлы қолшатырмен ойын ойнайық.
Қолшатырым , айналшы
Балалармен, көңілді
Күн мен жаңбыр ойнашы
Ойын: Күн мен жаңбыр
Шарты: Күн шыққанда балалар музыкамен билейді, кенеттен музыка тоқтап
жаңбырдың, найзағайдың даусы шыққанда балалар Күз ханшайымының
қолшатырына тығылады.
Жүргізуші: Келесі кезекте, балалардың күзге арналған жыр шумағын
тыңдайық
Тақпақтар:
Айдай. Қарашы күз келді,күз келді.
Жапырақ жауыпты іздерді.
Құс біткен керуен түзеді.
Қара бұлт қабағын түйеді.
Дана . Жайдары күз,жомарт күз,
Аяулы күз ,алтын күз.
Дәнге толы кең далам,
Дариядай шалқып жүр.
Ибраһим.Құстар ұшса жылы жаққа,
Күз келгенін білдірер.
Күн суытып,жел соғады,
Жылы киініп жүріңдер.
Айбат . Берекесін сыйлауға,
Өлкемізге күз келді.
Жемістерін сыйлауға,
Шақырады біздерді.
Айлин. Күздің қазан айында,
Алма, алмұрт піседі.
Жапырақтар сарғайып,
Сыбдыр ,сыбдыр етеді.
Актілек. Алтын, сары, қызыл, көк
Алуан, алуан жапырақ
Ағаштардан жамырап
Ұшты кенет жапырақ
Санжар.Қарашы күз елді
Сап сары бақтарда
Құстар да қайтады
Жып жылы жақтарға
Гүлайназ. Күз сиқырлы ханшайым
Бізге келер жыл сайын
Жеміс жидек көкөніс
Бәрі пісіп тұр дайын
Айшабибі. Күз көңілсіз демеңдер
Ол молшылық береке
Қысқа азық беретін
Қолы жомарт кең екен
Жасмин. Жемісті мол теретін
Күз дос екен бізбенен
Бәрін тауып беретін
Жомарт екен күздеген
Мерейлі. Ән салыңдар, күліңдер
Жайнап гүлдей жүріңдер
Күздің тойын тойлайық
Би билейік, ойнайық
Медина. Күздің әні суық жел
Көңілсіз бір салада
Аспан бұлтты жасыл жер
Сап сары боп барады.
Жүргізуші: Балалар күз келгенде нелер піседі?
Жемістер қайда өседі? Көкөністер қайда өседі?
Күз ханшайымы:Жарайсыңдар балалар сендер жемістер мен көкөністердің
қайда өсетінін біледі екенсіңдер . Ендеше , менің сиқырлы қолшатырымнан,
кәзір көкөністерді шығарайын.
Музыка жүреді. Күз ханшайымы қолшатырын айналдырып
Қолшатырым айналшы,
Куз байлығы, көкөністі,
Қолшатырдан шығаршы.
Көкөніс биі.
Кенеттен күн күркіреп, найзағай ойнап, желдің дыбысы шығады.
Жапырақтар ұшып келеді.
Күз ханшайымы: Ой, ой. Бұл не болды? Менің ғажайып қолшатырымды
ұшырып барады. Енді нестейміз?
Ортаға бұлт пен жел кіріп келеді
Жел: Сәлеметсіңдер ме, балалар? Мені таныдыңдарма? Мен, Желмін.
Сарғайған талдардың жапырақтарын ұшырып жерге түсіремін.
Бұлт: Сәлеметсіңдерме балалар?Мен, Бұлтпын. Мен аспаннан жаңбыр
жаудырамын. Жерді су қылдырамын.
Жүргізуші: Жел, Бұлт. Қоя тұрыңдар. Біз, Күз ханшайымымен, кішкентай
бүлдіршіндерімізбен Күз мерекесін тойлап жатырмыз. Ал, сендер, ортаны су
қылдыңдар. Онымен қоса, жапырақтарды шаштыңдар. Бүлдіршіндеріміз де
жаурап қалды.
Жел: Ой, кешіріңдерші, балалар!
Бұлт: Біз де сендермен бірге Күз мерекесін тойласақ бола ма?
Жүргізуші: Әрине,болады. Бірақ, мына жер әбден шашылып қалыпты. Бұл
жерде, біз қалай ша ән айтып, би билейміз?
Күз ханшайымы: Мен, білемін. Біздің бүлдіршіндеріміз өте еңбекқор.
Кәнекей менің ғажайып қолшатырымның көмегімен жапырақтарды жинап
тастайық
Қолшатырым айналшы,
Шашылған жапырақтарды,
Балалармен әп сәтте жинашы.
Жүргізуші:Ия біздің балалар өте еңбекқор , қазір шашылған жапырақтарды
әп сәтте жинап тастайды. Бірақ мына суды басып кетпеңдер! Әдемі
көйлектерің бүлініп қалмасын, балалар.
Ойын: Жапырақ жинау
Шарты: Балалар екі топқа бөлініп, шалшық суларды баспай, жапырақтарды
жинайды.
Күз ханшайымы: Балалар, менің қолымда неше қолшатыр бар? Өте дұрыс -
біреу. Қазір , мен осы сиқырлы қолшатырымның арқасында, біреу емес, көп
қолшатыр шығарамын.
Музыка жүреді. – Сиқырлы менің қолшатырым,
қолшатырдың ішінен ,
көп қолшатыр шығаршы!- деп Күз ханшайымы
қолшатырын айналдырғанда, ішінен бірнеше қолшатырлар шығады.
Би: Қолшатырлар
Күз ханшайымы: Балалар сендермен бірге бугінгі мереке көңілді
өтті.Қаншама қызықты ойындар білесіңдер, әдемі тақпақтар мен ән
айттыңдар.Сендер сондай ақылды балалар екенсіңдер. Ендеше менің
сендерге арнап әкелген сыйлығым бар. Сендер білесіңдер ғой менің
қолшатырым - сиқырлы. Кәнекей сиқырлы қолшатыр ойынын
ойнайық.Ортадағы себетте не бар балалар? Дұрыс айтасыңдар, себеттің іші
бос. Енді осы себетті ғажайып қолшатырыммен жабайын.
Кәне,шеңбер құрайық,
Билеп билеп алайық.
Шыр етіп айналып,
Көзімізді жұмайық.
Балалар көзін жұмып тұрған сәтте,себеттің ішіне күзгі жапырақтар
салынады.
Ал, балалар, бұрылып қарайық
Қол шатырды алайық
Астында не? Қарайық
Бұл не екен?
Балалардың жауабы: Жапырақ
Ендеше, тағы да шеңбер құрайық
Көзімізді жұмайық.
Балалар көзін жұмып тұрған сәтте,себеттің ішіне жемістер салынады.
Ал, балалар, бұрылып қарайық
Қол шатырды алайық
Астында не? Қарайық
Бұл не екен?
Балалардың жауабы: Жемістер
Күз ханшайымы: Себеттің ішінен не көріп тұрсыңдар. Бұл менің сендерге
әкелген сыйым , байлығым. Қандай керемет өнерлі екенсіңдер.Рахмет
балалар. Ендеше мені басқа балалар күтіп отыр .Сау болыңыдар балаллар.
Күз кетіп қалады. Балалар күз ханшайымымен қоштасады.
Ән: Күзгі вальс.
Жүргізуші: Осымен «Бәйтерек» ортаңғы тобының «Ғажайып сиқырлы
қолшатыр» атты ертеңгілігі аяқталды. Қош сау болыңыздар!